Institucionet e Kosovës nuk kanë ndërmarrë ndonjë veprim, as një ditë pasi është raportuar se Serbia i ka rihapur në komunat e veriut zyrat e Ministrisë së saj të Punëve të Brendshme.
Sipas Radios Evropa e Lirë, selia kryesore e MUP-it është afër shkollës fillore “Vuk Karaxhiq” në Zveçan, ndërsa të tjerat në Mitrovicë të Veriut, Zubin Potok e Leposaviq.
Analistët politikë që veprojnë në Mitrovicë kanë thënë se Beogradi ka ndërmarrë këtë veprim, për ta pamundësuar funksionimin e institucioneve komunale me udhëheqës shqiptarë, të zgjedhur më 23 prill, por që ende nuk e kanë nisur mandatin.
Profesori i shkencave politike, Nexhmedin Spahiu, ka theksuar se Kosova duhet ta përmbyllë procesin zgjedhor dhe se nuk duhet të lejojë që Serbia të vendosë kontroll mbi veriun.
“Besoj më tepër që këto janë shërbim për frikësim të institucioneve të Kosovës për të mos i vazhduar më tutje hapat të cilët është duke i ndërmarrë tani për ushtrimin e rendit simbolik rreth asambleve komunale, në gjykata dhe prokurori. Por, institucionet e Kosovës nuk duhet të tremben”, ka thënë Spahiu.
Nga Ministria e Punëve të Brendshme të Kosovës nuk u janë përgjigjur pyetjeve të Kohës në lidhje me rikthimin e strukturave të sigurisë së Serbisë në veri.
E në Eulex i kanë thënë Radios Evropa e Lirë se gjatë patrullimeve, nuk është vërejtur ndonjë ndryshim në terren.
Miodrag Miliçeviq nga organizata joqeveritare AKTIV, ka shprehur besimin se në veri nuk mund të rikthehet MUP-i. Sipas tij, Beogradi zyrtar nuk do ta bënte një lëvizje të tillë dramatike, meqë konsideron se nuk do t’i konvenonte asnjërës palë të përfshirë në dialog.
“Duke pasur parasysh se negociatat janë në vazhdim e sipër dhe natyrisht, marrëveshja që është arritur ndërmjet Prishtinës dhe Beogradit për integrimin e forcave policore, është shumë e vështirë të besohet se Beogradi në këtë moment, do të shkonte me një lëvizje të tillë, duke instaluar përsëri strukturat policore në veri të Kosovës. Duke pasur parasysh që kemi një forcë të rregullt policie dhe në dritën e marrëveshjes së Brukselit, nuk ka gjasa që kjo të ndodhë”, ka thënë Miliçeviq.
MUP-i mbylli zyrat në veri, në bazë të marrëveshjes së 2013-s, dhe pjesëtarët e saj u rekrutuan në Policinë e Kosovës. Por, fundvitin e shkuar, policët serbë të komunave të veriut u prinë resorëve të tjerë, për t’i braktisur institucionet, në shenjë pakënaqësie ndaj vendimit të Qeverisë për t’i konvertuar targat ilegale serbe në ato RKS.
