U raportua sot ekskluzivisht se gjyqtarja e Gjykatës Themelore në Mitrovicë, Tatijana Virijevic, mëngjesin e së martës ishte cak i një sulmi fizik. Virijevic dyshohet se u sulmua nga zyrtari policor Zoran Jelenic. Jelenic ishte jashtë detyrës zyrtare momentin kur i doli në pritë para Qendrës së Mjekësisë Familjare në Leposaviq dhe e sulmoi Virijevic.
Motivi i sulmit dyshohet të jetë një mosmarrëveshje në komunikacion.
Rastin e kanë konfirmuar për Sinjalin edhe nga Prokuroria në Mitrovicë. Zëdhënësi Valon Preteni njoftoi se rasti është iniciuar si “Sulm”.
“Për rastin është njoftuar prokurori kujdestar, dhe është iniciuar në drejtim të veprës penale “Sulmi”. Dyshohet që rasti ka ndodhur pas një mos marrëveshje të çastit në komunikacion”, tha Preteni.
Sulmi i policit ndaj gjyqtares po hetohet edhe nga Inspektorati Policor i Kosovës. Edhe nga IPK kanë thënë për Sinjalin se janë në fazë të grumbullimit të informatave.
“Duke ju referuar kërkesës suaj ju njoftojmë se IPK është njoftuar për këtë rast dhe hetuesit e IPK-së janë duke e trajtuar . Veprimet tjera do të ndërmerren bazuar në fushëveprimin ligjor të IPK-së dhe në koordinim me prokurorin kompetent”, thuhet në përgjigjen e IPK-së.
