Dy serbë janë arrestuar të mërkurën e 20 shtatorit në veri të Kosovës, në Mitrovicën e Veriut dhe në Zveçan.
Ndonëse nuk dihen arsyet e arrestimeve, mediumi lokal “Kossev” raporton se bëhet fjalë për dyshime për krime lufte.
Lidhur me arrestimet e dy serbëve pati reagim nga Lista Serbe.
Ajo e ka ndërlidhur arrestimin me politikë, duke akuzuar kryeministrin e Kosovës, Albin Kurti.
“Ju kujtojmë se arrestimi i bashkëkombësve, si dhe rrahja e të rinjve në Graçanicë, vijnë pasi Kurti refuzoi të marrë pjesë në mënyrë aktive në dialog dhe të depërshkallëzojë situatën në terren. Është e qartë se Kurti vazhdon me planin e tij që t’i zgjidhë çështjet e hapura politike me dhunë dhe forcë. Serbët në Kosovë i trajton si pengje në procesin e negociatave, ku mund t’i maltretojë sa herë të dojë dhe me këtë t’i dërgojë mesazh Bashkimit Evropian se s’mund t’i bëjnë gjë”, thuhet në reagimin e tyre.
Lista Serbe ka kërkuar nga KFOR-i dhe EULEX-i që “urgjentisht të parandalojë ndërhyrjen e forcave speciale dhe provokimet tjera nga regjimi i Kurtit, që kërcënojnë paqen dhe shkaktojnë tensione”.
