Emisari Special i SHBA-së për dialogun Kosovë – Serbi, Richard Grenell, ka reaguar ashpër ndaj kreut të Lëvizjes Vetëvendosje, Albin Kurti. Ai ka thënë e Kurti është gjithmonë kundër SHBA-së.
“Një gjë është e sigurt, gjithmonë mund të llogarisësh se Albin Kurti do të jetë kundër SHBA-së. Ishte kundër ideve të Obamas dhe ishte kundër ideve të Bushit. Simbolizmi nuk paguan qiratë; punët po”, ka shkruar Grenell në Twitter.
Ai i është kundërpërgjigjur ish-kryeministrit Kurti, pasi ai në një postim kishte thënë se s’do të kenë detyrime për zotimet e kryeministrit Avdullah Hoti, të cilin e ka quajtur të paligjshëm, kur të kthehen në detyrë.
“Nënshkrimi i tij poshtë teksteve jo koherente dhe jo transparente është kundër vullnetit të popullit, rendit demokratik dhe shkel kushtetutën e ligjet e Kosovës. Nuk do të ratifikohen në Parlamentin tonë. Ndërmjetësuesit duhet të ndalin së shtyri marrëveshje që shkaktojnë përçarje tjera mes Kosovës dhe Serbisë. Vetëm një dialog parimor dhe i përgatitur mirë çon te marrëveshje të drejta dhe të qëndrueshme”, ka shkruar Kurti ndër të tjera në Twiter.
