Kastrati tha se tre zyrtarët policorë janë marrë në territorin e Kosovës.
“Sipas deklaratës së policisë, ata kanë hyrë brenda dhe i kanë marrë këta tre zyrtarë. Kjo është faktikisht nxitje lufte ose revanshim… Absolutisht është nxitje nga ana e Serbisë, është nxitje lufte. Nuk shoh tjetër gjë. Ata kanë hyrë në territorin e Kosovës dhe i kanë marrë këta tre zyrtarë”, deklaroi Kastrati.Më tej, Kastrati shtoi se Kosova duhet të përdorë mjetet diplomatike për të kërkuar që zyrtarët policorë të kthehen në Kosovë.
“Institucionet duhet të bashkëpunojnë me KFOR-in, me Ministritë e Punëve të Jashtme, me kërkuar që ata të kthehen në Kosovë. Ne nuk mund të veprojmë, tash për tash në mënyrë tjetër. Unë nuk shoh zgjidhje tjetër. Por, duhet të bisedohet. Serbia dëshiron luftë, por ne duhet të jemi të vëmendshëm, duhet të jemi gjakftohtë. Dhe duhet të përdorim mjetet diplomatike”, u shpreh Kastrati.
Për rrëmbimin e tre zyrtarëve policorë reagoi edhe kryeministri Albin Kurti. Sipas tij, kjo është hakmarrje e Serbisë për arrestimin e djeshëm të kriminelit Millun Millenkoviq-Lune. Po ashtu, në reagimin e tij, Kurti theksoi se Policia e Kosovës është treguar e vetëpërmbajtur javët e fundit.
