Pas fillimit thuajse të papritur të edicionit të ri, i papritur ishte edhe rezultati i ndeshjes së parë. Arbëria e Dobrajës, që për herë të parë luan në Superligën e Kosovës në futboll, ka shokuar ish-kampionen, Trepçën ’89, të cilën e ka mposhtur me rezultatin 2:0.
Ndeshja është luajtur në Mitrovicë të premten dhe ka hapur edicionin 2020/2021 të Superligës së Kosovës në futboll.
Kreshnik Bahtiri shënoi për 1:0 në minutën e 17-të, kurse për 2:0 shënoi Agon Llugiqi në minutën e 76-të.
Ndeshja në “Riza Lushta” ishte e hapur dhe me plot raste shënimi.
Vetëm të premten FFK-ja ka marrë një lloj pajtimi nga Ministria e Shëndetësisë që të luhet kjo ndeshje. Zyrtarisht është në fuqi vendimi i Qeverisë që nuk lejon aktivitetet sportive. Por FFK-ja mori një leje të Ministrisë së Shëndetësisë që takimi në Mitrovicë të luhet dhe të jetë testues. Të paktën kështu është raportuar zyrtarisht nga FFK-ja.
Nga Ministria e Shëndetësisë nuk ka ndonjë njoftim.
FFK-ja të premten publikoi orarin e xhiros së parë dhe një letër urimi të kryetarit të Federatës për fillimin e edicionit të ri. Nuk është e qartë nëse do të luhen ndeshjet tjera.
