Albin Kurti kumton një vendim që hyn në fuqi sot: “Urime të gjithëve!”
Kurti, përmes një njoftimi në rrjetin social Facebook, tha se paga minimale është trefishuar përgjatë mandatit të tij.
“Paga minimale në vendin tonë ngeli e pandryshuar për më shumë se 10 vjet. 2011 ishte viti i fundit kur ajo u ndryshua. Që prej atëherë ajo mbeti 130 përkatësisht 170 euro (varësisht se a je nën apo mbi 35 vjeç)”, tha Kurti.
“Ndërkaq, gjatë qeverisjes sonë u ngrit katër herë: nga 130 e 170 euro në 250 euro, mandej në 350 dhe së fundi në 425 euro. E sot paga minimale u bë 500 euro. Prej kësaj rritjeje do të përfitojnë rreth 150 mijë punëtorë të sektorit privat.”
“Urime të gjithëve!”, përfundoi ai.
Vendimi për caktimin e pagës minimale në shumën prej 500 eurove, i cili nis zbatimin nga sot, ishte miratuar në një mbledhje të Qeverisë së Kosovës në fund të vitit të kaluar.
