Kryetari i Lidhjes Demokratike të Kosovës, Lumir Abdixhiku, ka bërë edhe një reagim për situatën në veri, duke thënë se moskoordinimi me aleatët, veçanërisht Shtetet e Bashkuara të Amerikës, sipas tij, është thjesht akt antishtetar.
Shtetet e Bashkuara të Amerikës kanë dënuar ashpër të premten veprimet e Qeverisë së Kosovës në tri komunat veriore – Leposaviq, Zveçan dhe Zubin-Potok – ku kryetarët e rinj kanë hyrë në objektet komunale, një ditë pas betimit.
Abdixhiku e ka vënë në pikëpyetje se kujt i shërben kjo politikë e Kosovës.“Moskoordinimi me aleatë – në veçanti me SHBA-të – është thejsht akt antishtetar. Kujt i shërben kjo politikë? Kujt i shërben një Kryeministër si ky? Kush përfiton kur Kosova i dhuron Serbisë të gjithë aleatët e saj? Ky s’mund të jetë çmimi ynë”, ka shkruar kryetari i LDK-së në Facebook.
Abdixhiku ka thënë se politika e matur dhe me miq është rruga e vetme e Kosovës, ndërsa ka shprehur mbështetje për zyrtarët policorë që ishin në veri.
“Në mbështetje të plotë të djemve tanë me shërbim në veri. Në kërkesë të paalternativë për koordinim të ngushtë me aleatë. Politika e matur, politika me miq, është rruga e vetme e Kosovës. Gjithçka tjetër çon në theqafje; ku dhe jemi nisur me një kryeministër si ky!”, ka shkruar Abdixhiku.
