Një konflikt i çastit në trafik ka përfunduar me kërcënime me armë dhe intervenim policor në Mitrovicë, raporton Gazeta Sinjali.
Burime të Sinjalit bëjnë të ditur se ngjarja ka ndodhur më 21 maj 2026 rreth orës 17:40 në rrugën “Evlia Qelebia”, ku ankuesi A. Haradinaj ka raportuar se derisa po lëvizte me veturë, një person me motoçikletë ia kishte prerë rrugën dhe më pas e kishte sharë.
Sipas kallëzimit, pasi kishte ndalur veturën dhe e kishte pyetur “Çka ki?”, i dyshuari Shkëlqim Salihi i ishte përgjigjur:
“Çka po m’kqyr shtrembët, ec se ta mbushi trupin plumba-plumba.”
Burimet bëjnë të ditur se gjatë kërcënimit, i dyshuari mbante dorën në çantën që e kishte krah-qafe dhe kishte ekspozuar pjesërisht armën.
Pas raportimit, Policia ka nisur kërkimin dhe e ka lokalizuar të dyshuarin në një autolarje në të njëjtën rrugë.
Gjatë kontrollit në çantën e tij janë gjetur dhe sekuestruar një pistoletë Glock 9×17, një karikator dhe pesë fishekë.
I dyshuari është intervistuar në prani të avokatit mbrojtës, ku ka pranuar se arma ndodhej në çantën e tij, por ka mohuar kërcënimet ndaj ankuesit.
Me konsultim të Prokurorit të Shtetit, rasti është iniciuar për “Kanosje” dhe “Mbajtje në pronësi, kontroll ose posedim të paautorizuar të armëve”, ndërsa i dyshuari është liruar në procedurë të rregullt.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
