“Nuk ka stuhi të re dhe as mars të 2004’ës , nëse dikush mendon se do presim kolonat e refugjatëve në Jarinjë dhe Bërnjak me ujë dhe sanduiçe, atëherë ky është një supozim dhe mendim i gabuar. Nuk do të doja të shihnin atë skenar dhe shpresoj që askush nuk duhet të provojë për të kuptuar se ne jemi të vendosur”, ka deklaruar Vuçeviq.
Duke folur për refuzimin eventual të KFOR-it për refuzimin e kërkesës së Serbisë për të lejuar kthimin, siç pretendojnë ata, të rreth një mijë trupave ushtarake serbe në Kosovë, Vuçeviç tha se në atë rast KFOR-i do të duhet t’i jep Serbisë garanci shtesë që KFOR-i është i aftë të ruajë paqen për të gjithë qytetarët.
“Nëse më pyesni mua se cila është përshtypja ime kur flas me përfaqësues të lartë, në rend të parë me NATO-n e që de fakto është KFOR-i, ata nuk duan konflikte. Se çfarë bën politika dhe kush e inkurajon Kurtin për të gjitha këto, nuk mund të nxjerr përfundime. Mbase edhe di diçka për këtë, por jo mjaftueshëm që ta deklaroj”, ka thënë ministri serb i mbrojtjes.
Më tej, ministri serb ka akuzuar Kurtin se dëshiron t’i dëbojë të gjithë serbët nga Kosova. Madje sipas tij, ky është qëllimi politik i kryeministrit.
