Barrikadat serbe në të paktën nëntë lokacione në veri kanë hyrë në ditën e 13-të. Edhe pikat kufitare në Jarinje dhe Bërnjak, vazhdojnë të jenë të mbyllura nga Policia e Kosovës.
Rritja e retorikës mes zyrtarëve ishte arsyeja e protestës së sotme “më të madhe ndonjëherë”, siç njoftoi Lista Serbe. Në pritje të protestës, afër Banjskës, gjegjësisht urës së Bistricës janë vendosur njësi të reja të Njësisë Speciale të Policisë së Kosovës, shkruan Kossev,
Kur është fjala për situatën në pjesën veriore të Mitrovicës, nata ka kaluar e qetë, përveç disa shpërthimeve të fuqishme. Objektet e hotelerisë vazhdojnë të punojnë me kohë të pjesshme, ashtu si nxënësit e shkollave fillore, ndërsa nxënësit e shkollave të mesme i ndjekin mësimet online.
Një numër i madh i patrullave policore janë vendosur në zonat multietnike dhe KFOR-i gjithashtu patrullon qytetin.
Dita e djeshme u shënua me vendosjen e pjesëtarëve të Njësisë Speciale në thellësi të veriut – afër urës së Bistricës pranë Banjskës.
Aty dje janë vendosur postblloqe policore, thonë nga PK, me qëllim parandalimin e aktiviteteve kriminale, kontrabandës, por edhe garantimin e lirisë së lëvizjes,
E pikërisht për të garantuar lirinë e lëvizjes, këtë javë janë mbajtur edhe stërvitje nga misioni i NATO-s në Kosovë, KFOR-i.
Ata thonë se ushtrimet duhet të testojnë aftësitë e tyre, pasi ato mund të “zbusin rrezikun kolektiv nëse marrëveshjet e ardhshme politike nuk mund të përmbushen”, megjithëse shtojnë se ka aktorë në terren të angazhuar për përparim.
Gjatë asaj kohe, përkundër temperaturave të ulëta, serbët qëndrojnë me ditë e netë nëpër barrikada në numër të madh.
Sot siç pritej do të ketë edhe më shumë, pasi pikërisht në mesditë Lista Serbe ka caktuar protestë në njërën nga barrikadat, në Rudar.
Protesta siç thonë serbët është organizuar si reagim ndaj deklaratës së pretenduar të kryeministrit të Kosovës se “Prishtina është e shqetësuar se heqja e barrikadave nuk mund të përjashtojë viktimat”, të cilën e kanë kuptuar si “njoftim dhe kërcënim serioz”.
Po ashtu, këtë reagim të Listës Serbe e ka shkaktuar edhe deklarata e ambasadorit gjerman në Kosovë, i cili ka bërë thirrje që barrikadat të hiqen sa më shpejt, sepse po vijnë Krishtlindjet.
Zyrtarët ndërkombëtarë dhe Qeveria e Kosovës kërkuan që të hiqen barrikadat dhe të pastrohen rrugët.
