Nënkryetari Arian Tahiri thotë se ia numëroj kryeministrit Kurti gjithë projektet që nuk u realizuan për Mitrovicë
Kryeministri Albin Kurti ka organizuar sot një takim me të parët e komunave të Kosovës. Ishte nënkryetari Arian Tahiri i cili e përfaqësoi Mitrovicën në këtë takim sot.
Përmes një postimi në Facebook, Tahiri tregon se ia numëroj Kurtit të gjitha projektet që nuk u realizuan për Mitrovicën.
Postimi i plotë:
Me qëllim të koordinimit ndër-institucional mes Qeverisë dhe Pushtetit Lokal, bashkë me kryetarët e komunave ishim në takim me Kryeministrin e Republikës së Kosovës, z. Albin Kurti.
Shfrytëzova mundësinë që t’i paraqes Kryeministrit sfidat dhe problematikat me të cilat po ballafaqohet Mitrovica.
Të dashur qytetarë, dua t’i listoj disa nga çështjet që unë i diskutova :
Në tabelat e buxhetit të qeverisë janë disa projekte të cilat ende kanë mbetur vetëm në tabela!
– Projekti i stadiumit “Adem Jashari”, të buxhetuara 1.600.000€, kontrata e lidhur në mes të MKRS-së dhe operatorit ekonomik, asnjë punë këtë vit, zero të shpenzuara nga vlera e ndarë për këtë projekt.
– Projekti për rregullimin e shtratit të lumit Ibër, të buxhetuara 400.000€, asnjë veprim konkret në teren, zero të shpenzuara nga vlera e buxhetuar.
– Projekti për rregullimin e shtratit të lumit Sitnica, të buxhetuara 568.048€, asnjë veprim konkret në teren, zero të shpenzuara nga vlera e buxhetuar.
– Çerdhja në lagjen Ilirida, të buxhetuara 150.000€, asnjë veprim konkret në teren, zero të shpenzuara nga vlera e buxhetuar. E potencoj, Komuna e ka ndarë parcelën dhe e ka njoftuar Ministrinë e Arsimit.
– Rruga për në fshatin Selac, të buxhetuara 960.000€, asnjë veprim konkret në teren, zero të shpenzuara nga vlera e buxhetuar. E potencoj, unë si përfaqesues i Komunës kam nënshkruar memorandum bashkëpunimi me zv.ministrin e Infrastrukturës z.Durmishi me datën 5 Korrik, dhe që nga atëherë e presim zotimin e mjeteve që të procedojmë me procedurë të prokurimit. Asnjë pergjigje. 3 muaj duke pritur për një punë e cila mund të përfundohet për vetëm 5 minuta, asnjë pergjigje, e ritheksoj!
– Rruga për fshatin Bistricë, të buxhetuara 900.000€, asnjë veprim konkret në teren, zero të shpenzuara nga vlera e buxhetuar. E potencoj, unë si përfaqesues i Komunës kam nënshkruar memorandum bashkëpunimi me zv.ministrin e Infrastrukturës z.Durmishi me datën 5 korrik, dhe që nga atëherë e presim zotimin e mjeteve që të procedojmë me procedurë te prokurimit. Asnjë pergjigje. 3 muaj duke pritur për një punë e cila mund të përfundohet për vetëm 5 minuta, asnjë pergjigje!
– Ndërprerja e memorandumeve në formë të njëanshme nga Ministria e Financave, Komunat i ka bllokuar dhe zhytur në borxhe, për shkak se financimi i projekteve që kanë qenë në ekzekutim, financimin e kanë pas nga ministritë përkatëse e me ndërprerjen e memorandumeve është ndërprerë edhe financimi ku më pas operatorët ekonomikë përmes procesit të përmbarimit privat i kanë realizuar pagesat duke krijuar probleme shtesë në kodet buxhetore tek komuna.
Janë këto, por edhe sfida të tjera që kerkojnë vullnet të dyanshëm për të bërë punë të mira. U kërkoj bashkëpunim.
E kemi obligim ndaj qytetarëve. Institucionet e kanë vazhdimsinë e tyre, shtetin e kemi të përbashkët, dhe bashkë të gjithë shumë fort duhet të punojmë që ta forcojmë vendin tonë.🇽🇰
