Në klubin mitrovicas janë të bindur se titulli do të jetë në duart e tyre dhe festa do t’i takojë tifozerisë “Torcida” që pritet ta stërmbushin palestrën “Minatori”.
Trajneri Ilir Selmani thotë për KosovaPress se kualiteti i skuadrës dhe mbështetja e madhe e tifozëve në palestër do të jenë faktor vendimtar që Trepça të shpallet kampion“Atmosfera është e mirë, djemtë janë të përkushtuar maksimalisht, të përqendruar. Lëndime nuk kemi përveç qendrës sonë i cili për momentin ka pësuar një lëndim lojën e fundit dhe do ta shohim konstatimin e mjekëve se a është në gjendje të paraqitet në lojën e ardhshme. Unë besoj në kualitetin e tyre, besoj në përkrahjen e madhe te qytetarëve të Mitrovicës, besoj në përkrahjen e madhe të tifozerisë “Torcida” edhe besoj që të enjten do të kurorëzohemi me titullin kampion”, tha Selmani.Kurorëzimin eventual me titull kampioni Selmani e konsideron si një arritje historike për të personalisht, derisa tifozëve u bënë thirrje për sjellje korrekte gjatë ndeshjes.
Ndërsa, njeriu kryesor i Trepçës në katër ballafaqimet me Pejën, Drilon Hajrizi, ka thënë për KosovaPress se Trepça e ka dëshmuar tashmë që është skuadra më e mirë në ligë. Ai premton maksimumin e tij gjatë një ore lojë ndaj Pejës.
