Hasan Dakaj, ish-ushtar i Ushtrisë Çlirimtare të Kosovës është arrestuar gjatë mbrëmjes së kaluar nga Serbia. Ai u arrestua derisa po kalonte kufirin me vëllanë e tij, Xhavit Dakaj, ky tashmë është liruar sipas informacioneve të fundit nga Ministria e Punëve të Jashtme të Kosovës. Ndërkohë, në lidhje me krejt këtë situatë, ende nuk ka një reagim nga kryeministri i vendit, Albin Kurti.
Xhevdet Smakiqi, avokat, të premten përmes një shkrimi në llogarinë e tij në Facebook njoftoi se dy vëllezërit janë arrestuar duke udhëtuar për në Itali.
Hasan Dakaj, sipas Smakiqit, është dërguar në qendrën e ndalimit në Kushumli.
“Familja Dakaj është nen frikë dhe ankth te madh pasiqe polica serbe Hasan Dakaj ish pjestarin e UÇK-se sipas informatave te para e kanë dërguar ne qendren e ndalimit ne Kushumli dhe mund ti nenshtrohet toroturave fizike e psiqike apo edhe me keq.” – deklaroi ai.
Çka thonë institucionet?
Nuk vonoi shumë, reagoi edhe Ministria e Punëve të Jashtme. Përmes një komunikate për media, u njoftua se Xhavit Daka është liruar.
Sipas MPJ-së ndërkaq, “janë aktivizuar të gjithë mekanizmat institucional” dhe janë njoftuar partnerët ndërkombëtarë.
“Për këtë rast është njoftuar Zyra e BE-së në Serbi, Ambasada e SHBA-ve dhe ajo e Britanisё sё Madhe nё Serbi. Ministria e Punëve të Jashtme dhe Diasporës dënon ashpër ndalimin, arrestimin dhe keqtrajtimin e qytetarëve të Republikës së Kosovës dhe njëkohësisht i bën thirrje Bashkësisë Ndërkombëtare që të ndermarrë hapa konkret për lirimin e menjëhershëm të qytetarit Hasan Daka dhe njëkohësisht të kërkojë përgjegjësi nga shteti serb për këto veprime arbitrare dhe destruktive dhe që bien ndesh me konventat ndërkombëtare për të drejtat e njeriut.” – thuhet tutje.
