Ministri i Kulturës, Rinisë dhe Sportit, Hajrulla Çeko, ka bërë të ditur se shtëpia ku ndodhi masakra e 15 prillit 1999 në Lagjen e Boshnjakëve, në Mitrovicën e Veriut, po shndërrohet në muze kujtese.
Në këtë objekt, gjatë luftës, u torturuan dhe u vranë në mënyrë mizore 23 qytetarë të kësaj lagjeje. Ministri Çeko, së bashku me ministrin e Punëve të Brendshme, Xhelal Sveçla, dhe ish kryetarin e Komunës së Mitrovicës së Veriut, Erden Atiq, kanë vizituar objektin për të parë nga afër ecurinë e punimeve.
Sipas tij, muzeu do të ruajë gjendjen dhe gjurmët e krimit, duke shërbyer si vend kujtese, reflektimi dhe ndërgjegjësimi për brezat e ardhshëm.
Ministri Çeko theksoi se kujtesa e këtyre krimeve është përgjegjësi e përbashkët institucionale dhe shoqërore, si dhe një thirrje e vazhdueshme për drejtësinë e munguar.
