Dukuria e fajdesë, që nënkupton huazimin e parave të cilat më pas duhet të kthehen me interes shumë të lartë, përveç se përbën vepër penale, është mjaft shqetësuese dhe e rrezikshme. Të tilla raste janë shumë të shpeshta në vendin tonë dhe kjo po dëshmohet me arrestimin e personave që përfshihen në këtë veprimtari. Për një rast të tillë, Prokuroria Themelore në Mitrovicë ka iniciuar hetim pas denoncimit të një rasti, raporton Gazeta Sinjali.
Raportimi i një 35-vjeçari në Mitrovicë në fund të janarit, i cili pretendoi se është viktimë e fajdesë, aktivizoi Policinë dhe si rezultat, u identifikua personi i dyshuar dhe i përfundoi në Polici.
Sinjali mëson se i dyshuari në këtë rast është I.Hyseni dhe ndaj tij, Prokurori i Shtetit nuk ka urdhëruar fare masën e ndalimit policor dhe si rrjedhojë i dyshuari është lënë i lirë.
Një gjë e tillë është konfirmuar edhe nga Policia Rajonale në Mitrovicë.
Cilat janë detajet nga denoncimi i të riut mitrovicas, i cili kërkoi ndihmën e Policisë?
Siç merr vesh Sinjali, fillimisht i dyshuari ia kishte dhënë një shumë të parave viktimës dhe disa vetura, e më pas e ka kërcënuar që t’ia kthejë borxhin në vlerë më të madhe se paratë që ia dha hua.
Bazuar në dëshminë e viktimës, nga i dyshuari ka marrë vetura borxh në vlerë prej mbi 10 mijë euro, ndërsa për të njëjtat i janë kërkuar kthim 25 mijë euro.
Njësia e hetimeve ka ndërmarrë veprimet e nevojshme dhe ka siguruar prezencën e të dyshuarit, i cili ka dhënë deklaratën e tij para hetuesve policorë.
Prokurori i Shtetit e ka liruar më pas, për t’u hetuar në procedurë të rregullt, për veprën penale “Fajdeja”.
