Pikat kufitare me Serbinë, Jarinja dhe Bërnjaku, janë liruar për qarkullim. Këtë e ka konfirmuar Policia e Kosovës, në një njoftim për media të lëshuar të premten.
Sipas Policisë të gjitha barrikadat që kanë qenë të vendosur në veri që nga 10 dhjetori, si pasojë e të cilave këto pika ishin mbyllur, janë larguar
“Bazuar në informacionet e deritanishme, është bërë largimi i barrikadave në formën siç ato ishin vendosur, dhe pas kësaj është vlerësuar edhe hapja e dy pikëkalimeve kufitare Jarinje dhe Bërnjak, të cilat sot (30.12.2022) në orët e pasdites janë hapur për qarkullim”, thuhet në njoftimin e Policisë.
“Bllokimi i kundërligjshëm i rrugëve, sulmet e kryera ndaj institucioneve të sigurisë, mediave dhe qytetarëve, kishin ndikuar në përkeqësimin e situatës dhe në vështirësimin e jetës së qytetarëve të asaj zone të cilët nuk kanë mundur të kenë lëvizje të lirë si dhe nuk e kanë pasur qasjen e lehtë në shërbimet e tyre të nevojshme”, thuhet në njoftim.
Liria e lëvizjes, parandalimi i akteve kriminale dhe ofrimi i sigurisë, thuhet se janë në dobi të të gjithë qytetarëve dhe për këtë theksohet se Policia e Kosovës në vazhdimësi do të angazhohet duke bashkëpunuar ngushtë me institucionet vendore dhe ndërkombëtare.
Pikat kufitare në Jarinjë dhe Bërnjak ishin mbyllur më 10 dhjetor, pasi serbët lokalë kishin bllokuar disa rrugë, në shenjë revolte ndaj arrestimit të ish-policit të Kosovës, Dejan Pantiq. Ai u arrestua si i dyshuar për organizimin e sulmeve ndaj zyrtarëve të Komisioneve Komunale Zgjedhore në veri dhe Policisë së Kosovës.
Barrikadat nga këto rrugë janë hequr të enjten pasdite, pasi që një ditë më herët, Gjykata Themelore në Prishtinë, me kërkesë të Prokurorisë Speciale, ish-policit Pantiq, ia ndryshoi masën e sigurisë, nga paraburgimi në arrest shtëpiak.
Ndërkohë që pika kufitare në Merdar, e cila ishte mbyllur për qarkullim më 27 dhjetor, është hapur të enjten në mëngjes. Ajo ishte mbyllur pasi që në Serbi, dy kilometra nga pika kufitare, ishte vendosur një barrikadë.
