Prokuroria Themelore në Mitrovicë ka ngritur aktakuzë kundër të pandehurit D.S., për sulm ndaj gazetarit të një mediumi gjatë trazirave më 29 dhe 31 maj në Zveçan.
Prokuroria ka thënë se ka dyshim të bazuar mië se ai ka kryer veprat “Pjesëmarrja në turmë dhe huliganizmi“ dhe “Sulmi“.
“I pandehuri, me datë 29 maj 2023 dhe me 31 maj 2023, në Zveçan, me dashje, ka marrë pjesë në turmën e mbledhur të personave, të cilët me veprimet e tyre ka shkaktuar rrezik të përgjithshëm, ashtu që, derisa persona të maskuar ishin duke e sulmuar veturën e Policisë së Kosovës, i pandehuri së bashku me persona tjerë kanë sulmuar gazetarin e mediumit RTV-21 B.Z., policët e Kosovës, dhe gazetarët tjerë që ishin prezent”, thuhet në komunikatën e Prokurorisë.
Po ashtu, më 31 maj D.S., përdori forcën ndaj gazetarit B.Z., i motivuar në bazë të kombësisë, ku i dëmtuari ishte duke i përcjellë protestat që zhvilloheshin nga komuniteti serb afër objektit të komunës së Zveçanit, dhe ishte një grup i protestuesve me maska të cilët nisen në drejtim të një veturë të Policisë së Kosovës, e i dëmtuari niset në drejtim të tyre me qëllim të fotografimit dhe xhirimit. Por, në ato momente një grup prej tre personave i kërkojnë që t’i fik pajisjet, dhe e fyejnë si dhe kërkojnë që të largohen ekipa e mediumit, dhe në momentin që fillojnë të largohen, “grupi i personave fillojnë t’i ndjekin dhe gjatë largimit, i pandehuri përdor forcën ndaj të dëmtuarit – gazetarit B.Z., duke e goditur me grusht në bel në anën e djathtë”, sqarohet më tej nga prokuroria.
Prokurori i Shtetit ka propozuar që gjykata të pandehurin ta shpallë fajtor për veprat e kryera penale dhe ta dënojë sipas ligjit.
